Fyrirtækið Tengi var stofnað í desember 1981 af hjónunum Sigurjóni G. Sigurjónssyni og Önnu Ásgeirsdóttur.
Reksturinn var fyrstu árin sem aukabúgrein, en óx svo fiskur um hrygg og það má segja að þáttaskil hafi orðið í rekstrinum þegar Tengi hóf innflutning á Mora blöndunartækjum árið 1985.
 
Þá fór reksturinn á fullt í þann farveg sem hann er í dag, þ.e.a.s. innflutning og sölu á hreinlætistækjum og pípulagningaefni.

Tengi er fjölskyldufyrirtæki og hefur starfsemi fyrirtækisins alltaf verið í Kópavogi. Eins og í mörgum góðum fyrirtækjum byrjaði reksturinn smátt, var fyrstu árin í bílskúrnum, en árið 1988 var tekin sú ákvörðun að flytja starfsemina að Nýbýlaveg 18 þar sem fyrirtækið var í 7 ár.

Vöxturinn var alltaf upp á við á hverju ári, við bættust ný vörumerki til að styrkja flóruna sem fyrir var og ekki leið á löngu þar til húsnæðið var orðið alltof lítið og tími til kominn að færa sig á ný.

Árið 1995 var keypt húseignin Smiðjuvegur 11 og 11a og þar hófst annar kafli í sögu Tengis og fyrirtækið dafnaði vel.
Eftir 10 farsæl ár var ákveðið að ráðast í að byggja nýtt húsnæði að Smiðjuvegi 76 og var starfsemin flutt þangað 25. júlí 2005.
Haft var að leiðarljósi að húsið væri sýningarhús fyrir þær vörur sem Tengi er með í sölu og allar lagnir í húsinu væru sem sýnilegastar. 

Í janúar árið 2007 var reksturinn útvíkkaður enn frekar með opnun nýrrar verslunar að Baldursnesi 6 á Akureyri og hefur sá rekstur gerbreytt aðstöðu okkar á því svæði og verið mjög vaxandi.
Markmið fyrirtækisins hafa frá byrjun verið að bjóða góða og viðurkennda vöru á hagstæðu verði frá þekktum framleiðendum þar sem við höfum byggt upp áralangt og traust samband.
Við stöndum 100% á bak við það sem við seljum og þjónustan er lykilatriði.

Við höfum átt mjög gott samstarf við hönnuði, arkitekta, pípulagningamenn og aðra fagmenn í byggingariðnaðinum.
Við höfum haft það að leiðarljósi að fylgjast vel með því sem er að gerast í þessum geira varðandi nýjar vörur, reynt að tileinka okkur það að vera framarlega með nýjungar og horfum til framtíðar, umhverfið í nútíð og framtíð.
Við lítum á Tengi sem fagfyrirtæki sem er í samstarfi með fagmönnum.
Við reynum að koma vöru okkar á framfæri á faglegan hátt með t.d. kynningum og ráðstefnum þar sem aðilar frá framleiðendum koma fram.
Það er ljóst að áhugi fagmanna á því sem er að gerast í lagnaheiminum hefur aukist mikið gegnum árin og lagnamál eru einnig orðin áhugamál.
 
Fyrirtæki er aðeins jafngott og fólkið sem vinnur í því.
Tengi hefur verið svo lánsamt að hafa á að skipa frábæru starfsfólki.
Margir þeirra hafa verið hjá Tengi í mörg ár og hafa gríðarlega reynslu og þekkingu á hreinlætistækjum og pípulagningaefnum.  
Heilsteypt liðsheild er frábær kostur hvers fyrirtækis og það höfum við svo sannarlega.

Tengi mun hér eftir sem hingað til leitast eftir því að vera leiðandi fyrirtæki og byggja reksturinn upp með sama hætti og verið hefur, þeir sem þekkja okkur vita eftir hverju er að sækjast og það gefur okkur mikið að margir af okkar viðskiptavinum hafa byggt upp langtímasamband með okkur sem byggt er upp á áreiðanleika, trausti og persónulegri þjónustu.

Virðingarfyllst,
f.h. Tengi ehf.
Þórir Sigurgeirsson
Framkvæmdastjóri 


Leitarvél